پاکستان میں بعض نام نہاد آزادخیال حلقے روز اول ہی سے یہ ثابت کرنے کی ناکام کوشش میں مصروف ہیں کہ بانی پاکستان قائداعظم محمد علی جناحؒ پاکستان کو ایک لادین (سیکولر) ریاست بنانا چاہتے تھے۔گذشتہ کچھ عرصہ سے ان لوگوں کی اس مہم میں تیزی آگئی ہے اور وہ ذرائع ابلاغ اور کانفرنسوں کے توسط سے اپنے جن نظریات کا پرچار کر رہے ہیں اس سے بعض پاکستانیوں اور خصوصا ہماری نوجوان نسل کے ذہنوں میں خلفشار پیدا ہوسکتا ہے۔ یہ لوگ ایڑی چوٹی کا زور لگا کر ہمیں باور کرانا چاہتے ہیں کہ قائداعظمؒ پاکستان کو ایک ایسا ملک بنانا چاہتے تھے جس میں مذہب کا تعلق صرف شہری کی ذات تک محدود رہے اور مملکت کے امور میں مذہب کا کوئی عمل دخل نہ ہو۔ یہ حضرات بھول رہے ہیں کہ سرسید احمد خان سے لیکر قائد اعظم تک سب مسلمان رہنمائوں نے اسلام کو ہی مسلمان قومیت کی بنیاد ٹھہرایا اور دین اسلام کو ملک کے تمام امور میں ایک جاری وساری نظام کی حیثیت دی اور وہ اس لیے کہ یہی ارشاد ربانی ہے۔ علامہ اقبال نے تو بہت ہی واضح الفاظ میں کہا کہ

جدا ہودیں سیاست سے تو رہ جاتی ہے چنگیزی

نظریہ پاکستان کونسل اسلام آبادکا نقطہ نظریہ ہے کہ لادینی ملک اور معاشرہ بے یقینی، ذہنی خلفشار اور بے سمتی کا شکار ہو کر رہ جاتا ہے۔ اگرحالات و واقعات اورتحریک پاکستان کا مطالعہ کسی خارجی گمراہ کن تحریک سے متاثرہوئے بغیر کیا جائے تو ہرمصنف مزاج ذہن تسلیم کرے گا، کہ اسلام ہی قیام پاکستان کی بنیاد ہے۔
نظریہ پاکستان کونسل (ٹرسٹ)کے مقاصد میں سے ایک یہ ہے کہ پاکستان کی نظریاتی بنیادوں کو اجاگر کرے اور پاکستان کی نظریاتی اور دینی بنیادوں پر ہونے والے اعتراضات اور حملوں کا توڑ کرے تاکہ وطن عزیز مستحکم بنیادوں پر آگے بڑھ سکے اور ہم بانی پاکستان قائداعظم محمد علی جناحؒ کے تصور پاکستان کے مطابق وہ اعلیٰ وارفع مقام حاصل کر سکیں جن کے لیے یہ ملک حاصل کیا گیا تھا

            زاہد ملک
                        چیئرمین، نظریہ پاکستان کونسل، اسلام آباد